Poliziano, Angelo

Angeli Politiani in Georgica Vergilii commentarium

Vide quam industrie hunc locum Columella
imitetur, quam rursus ingenue non dissimulet:

Ingenera: nunc sunt genitalia semina mundi
nunc amor ad coitus properat, nunc spiritus orbis
bacchatur Veneri, stimulisque cupidinis actus
ipse suas adamat partis, et foetibus implet.
Nunc pater aequoreus, nunc et regnator aquarum,
ille suam Tethyn, hic pellicit Amphitryten,
et iam caeruleos partus enixa marito
utraque nunc reserat pontumque natantibus implet.
Maximus ipse deum posito iam fulmine fallax
Acrisioneos veteres imitatur amores,
inque sinus matris violento defluit imbri.
Nec genitrix nati nunc aspernatur amorem,
sed patitur nexus flammata cupidine tellus.
Hinc maria, hinc montes, hinc totus denique mundus,
ver agit: hinc hominum pecudum volucrumque cupido,
atque amor ignescit menti, saevitque medullis,
dum satiata Venus fecundos compleat artus,
et generet varias soboles, semperque frequentet
prole nova mundum, vacuo ne torpeat aevo.
Sed quid ego infreno volitare per aethera cursu
passus equos audax sublimi tramite raptos?
Ista canat, maiore deo, quem Delphica laurus
impulit et rerum causas et sacra moventem
orgia naturae, secretaque foedera caeli
M. quoque Manlius Astronomicon libro III:

Tum primum muta pelagus consternitur unda
et varios audet flores emittere tellus
tum pecudum volucrumque genus per pabula laeta.
in Venerem partumque ruit, totumque canora
voce nemus loquitur, frondemque virescit in omnem.

pagina successiva »

p. 122