informazioni|progetto|link|home|

Della Porta, Giovan Battista

Coelestis Physiognomoniae libri sex

semper ingenuus habendi liberam potestatem et qui non in omnibus
malitiae vires exercere, vivendi et imperandi vota concipiet et propriis
laboribus acquirens substantiae facultatem. Leupoldus: Leo totus
bonus, fortis, sapiens, iracundus, dedecus sibi facientibus, foemina
virilis. Bonatus: Leo hominem industrium facit, notum valde et
intelligentem, superiora maiora, inferna vero graciliora, nec inde effi-
cietur indecens, crura subtilia. Diximus ex Ptolemaeo Leonem facere
superiora maiora et inferiora graciliora; ob id dixit Hali, superiora
maiora, ampli pectoris et subtilium crurum. Leonis imaginem efficiunt
quamplurimae stellae, et primae magnitudinis, naturae ut plurimum
Martis, ut duae illae in capite et in corde Martis caliditate pollentes,
Veneris et aliae et ioviae, quae nato caliditatem et humiditatem prae-
stant, ob id magnae et acerbae irae, ut leo, magnanimum animal et
notum et ideo, ut diximus in Physiognomonicis, notus sua fortitudine,
libertatis cupidus et qui aliis subiugari nequeat, immo imperandi et
bellandi luxuria laborabit. Divitias acquiret ut, qui eas facile largiatur,
facile aliis auxiliabitur ob regalem suum animum, ob id variis periculis
implicabitur ex se et laboribus.

Caput VIII.
De Virginis corporatura et moribus
et rationibus physicis contra astrologos.

Ex Hali: Virgo, ut honestas dicet virgines, est pulchri corporis,
bonorum morum, longa aliquantulum, bene instituta, non est pinguis,
fidelis est et veridica. Esse potest doctrix scribendi et bonae insti-
tutionis, et quod his assimilatur. Bonatus: Virgo reddit hominem
habentem pulchram personam, pulchros oculos, faciem decentem et
bonam voluntatem. Leupoldus: Virgo in omnibus bona, vir castus,
amabilis, foemina casta, bona, humilis, dives, boni moris prae omnibus
praedictis. Maternus: Si in Virgine horoscopus fuerit inventus, erit
multis laboribus et multis sollicitudinibus implicatus. Erit sane laetus,

pagina successiva »