informazioni|progetto|link|home|

Della Porta, Giovan Battista

Coelestis Physiognomoniae libri sex

Luna, in omnibus partibus Capricorni, est nobilis, altus, magnae
laudis, nominis et bonae famae, formosus, compositae staturae,
bonarum vestium et lympidus. Maternus: Luna in Capricorno si
fuerit inventa, erunt formosi, venusti, decori ac in omnibus membris
ex toto corpore delectabili quadam proportione compositi, ornatis
vestibus delectatoque apparatu gaudentes eaque de causa a multis
dilecti, a plerisque etiam venerati, nobiles erunt, divites et potentes,
alti nominis magnaeque existimationis et famae.
Luna, in omnibus partibus Piscis, est similis servo et vili in habitu
et vestibus suis, diligit venari, gaudere, ludere, ludis nihil sibi profuturis,
stare quietus et non cogitare de aliquo negotio suo. Maternus:
Quicunque Lunam sic habuerint, erunt humiles, abiecti, pauperes,
despecti, vestibus et pannis obsiti ac penitus servis similes, ociosi,
inertes, nullarum cogitationum, venatores, aucupes et lusores et qui
huiusmodi semper voluptatibus impliciti.

Caput XXIV.
Saturnus per zodiaci signa quam formam et mores largiatur.

Ex Hali: Saturnus in prima facie Tauri est effoeminatus in suis
factis, iacet cum iuvenibus et parvis pueris et etiam cum puellis. In
aliis ambabus faciebus est senex, membris debilis, mutilus corpore,
fessus, damnatae fortitudinis et voces emittit in dolo super seipsum.
Saturnus in toto Cancro est turpissimi vultus et mirabilis creatura
formae et visionem suam ita expavescent et mirabuntur de figura eius
quotquot eum videbunt et audient loqui de eo. Maternus: Quod si
in Cancro Saturnus positus fuerit aut secum habuerit Luna aut etiam
forti radiatione respexerit, filios denegabit eruntque aliquo colorum
foeditate deformes, nigri quoque et fellis abundantia colorati a nigro
felle assidua contrahentes incommoda. In aegritudinibus sane
desperabitur ac post aegritudinem difficile convalescent. Erunt tamen
animo simplices, humani, misericordes, alienas angustias sublevantes,
aliena quoque patrimonia suscipientes atque ex his habentes vitae
subsidia. Erunt alienorum filiorum patres, absconsa vitia habentes ac

pagina successiva »