informazioni|progetto|link|home|

Agrippa von Nettesheim, Heinrich Cornelius

De occulta philosophia libri tres

extis futura perquirentes, iecur primum inspiciebant, duobus in eo
constitutis capitibus, quorum unum civi, alterum hosti nun-
cupabant collatisque capitibus huius aut alterius partis pronuntia-
bant victoriam, quemadmodum apud Lucanum Pompeianorum
caedem ac Caesareanorum victoriam exta significasse legimus in his
versibus:
Quodque nefas nullis impune apparut extis,
Ecce vidit capiti fibrarum increscere molem
Alterius capitis; pars aegra et marcida pendet,
Pars micat et celeri venas movet improba pulsu.
Deinde, perfectis visceribus, cor perquirebant: quod, si hostia sine
corde reperta esset aut caput in iocinore defuisset, pestifera haec
erant auspicia et piacularia dicebantur; similiter etiam si hostia ab
ara profugisset aut percussa mugitum dedisset aut in aliam quam
oporteret corporis partem cecidisset. De his legimus Iulio Caesari,
quo die veste purpurea processit et in sella aurea sedit, sacrificanti
cor in extis bis defuisse; et C. Mario Uticae immolanti, iecur in extis
defuit; similiter et Caio principi et M. Marcello; C. Claudius et L.
Petellius consules cum immolassent victimas, iecur subito tabuit:
nec multo post hic morbo, alter Ligurum armis interiit, extis ita
praedicentibus; quod profecto aut deorum virtute aut daemonum
opera fieri putatur. Hinc maximi semper apud veteres momenti
habitum est, quoties insolitum quid in extis appareret: quemadmo-
dum Syllae apud Laurentum sacrificanti similitudo coronae in ca-
pite iecoris apparuit, quod Posthumius aruspex illi victoriam cum
regno portendere interpretatus est admonuitque iccirco, ut solus
Sylla extis illis vesceretur. Ipse etiam extorum color suam conside-
rationem habet; de istis meminit Lucanus:
Terruit ipse color vatem: nam pallida tetris
Viscera tincta notis gelidoque infecta cruore
Plurimus asperso variabat sanguine livor.

pagina successiva »